डोटीमा जेठ १५ सम्म लम्ब्याइयो निषेधाज्ञा

डोटी । डोटीमा जारी निषेधाज्ञा जेठ १५ सम्म लम्ब्याइएको छ । कोरोना जोखिम बढेको भन्दै डोटीका प्रमुख जिल्ला अधिकारी सुनिल पोखरेलले थप कडाईका साथ डोटीमा निषेधाज्ञाको आदेश जारी गरेका छन् ।

प्रमुख जिल्ला अधिकारी पोखरेलले कोरोना भाइरस संक्रमणको जोखिम बढ्दै गएपछि बैशाख २१ गतेदेखि लागू गरिएको निषेधाज्ञा जेठ १५ गतेसम्म थप गरेका हुन् । निषेधाज्ञाको समयमा जिल्लामा अत्यावश्यक बाहेकका सबै सवारी साधन बन्द रहनेछन् ।

जिल्लामा अब खाद्य सामग्री, औषधि तथा स्वास्थ्य सामग्रीका पसल बाहेक सबै पसल बन्द रहनेछन् । खाद्य सामग्रीका पसलहरु बिहान ६ बजेदेखि बिहान ९ बजेसम्म र साँझ ५ बजे देखि ७ बजे सम्म मात्रै खोल्न पाइने छन् ।

अत्यावश्यक सवारी साधन जस्तै एम्बुलेन्स, खाद्य तथा स्वास्थ्य सामग्री बोकेको सवारी साधन, दुग्धजन्य पदार्थ बोकेको सवारी साधन मात्र सञ्चालन गर्न पाइने छ । बैंक तथा बित्तीय संस्थाका सवारी, दूरसञ्चार तथा इन्टरनेट र आइसोलेसनका सवारी स्पष्ट खुल्ने कागजातका आधारमा सञ्चालन हुनेछन् ।