नेपालगन्जमा  होम आइसोलेसनका बसेका संक्रमितहरुका लागि वार्डमै बिशेषज्ञ सेवा

नेपालगन्ज । कोरोनाको जोखिम बढ्दै गएपछि नेपालगञ्ज उप–महानगरपालिकाले वडास्तरमैं विशेषज्ञ सेवा उपलब्ध गराउने  भएको छ । नेपाल चिकित्सक संघ भेरीको सहकार्यमा होम आईसोलेसनमा बसेका कोभिड संक्रमितहरुलाई उपमहानगरपालिकाले विशेषज्ञ सेवा उपलब्ध गराउने भएको हो ।

 नेपालगञ्ज उप–महानगरपालिकाको अनुरोधका आधारमा चिकित्सक संघले नगरका सबै २३ वटै वडामा बिशेषज्ञ सेवाका लागि चिकित्सकलाई पठाउने भएको छ । यसका लागि संघले चिकित्सकहको जिम्मेवारी समेत तोकेको छ ।

उपमहानगरपालिकाले दिएको जानकारी अनुसार, वडामा रहेका स्वास्थ्य फोकल पर्सनहरुले शुरुमा होम आईसोलेसनमा बसेका संक्रमितहरुको स्वास्थ्य अवस्थाबारे जानकारी लिनेछन्  । आवश्यकता अनुसार उनीहरुको बिरामीको बारेमा वडामा जिम्मेवारी पाएका चिकित्सकहरुसँग सम्पर्क गर्ने छन् ।

वडास्तरमै बिशेषज्ञ सेवा पुरयाउनेबारेमा शनिबार चिकित्सक र स्वास्थ्य फोकलपर्सनहरुबीच अन्तरक्रिया भएको छ । कार्यक्रममा नगर प्रमुख डा. धवलशम्शेर राणाले सञ्चालित आईसोलेसन, हेल्थडेस्कलाई प्रभावकारी बनाएर लैजानु पर्ने बताए ।

नेपालगञ्ज उपमहानगरपालिका स्वास्थ्य शाखा प्रमुख राम वहादुर चन्दले नगरमा महामारी रोकथाम र नियन्त्रणको अभियानलाई थप व्यवस्थित बनाउन चिकित्सक र स्वास्थ्यकर्मीबीचको समन्वव बैठक गरिएको जानकारी दिए ।