सन्तोष मेडिको प्रा.लिमा प्रहरीको छापा, एक जना पक्राउ

धनगढी ।  चिकित्सकको स्विकृती बिना औषधि खरिद बिक्री गरेको आरोपमा प्रहरीले धनगढीको सन्तोष मेडिको प्रालिका एक जनालाई पक्राउ गरेको छ ।

छापा हान्दा स्पास्मो २०२ टयाब्लेट, पर्लिन–७५ का २९७ क्याप्सुल र प्रेग्यास्टार–१५० का ६१५ क्याप्सुल फेला पारेपछि सन्तोष मेडिकोमा कार्यरत  धनगढी–५ का करन चौधरीलाई पक्राउ गरिएको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतीक विष्टले बताए ।

धनगढीको एलएनचौकमा पक्राउ परेको व्यक्तिले सन्तोष मेडिकोबाट औषधी किनेको बताएपछि प्रहरीले उक्त पसलमा छापा मारेको थियो ।

आइतबार बिहान धनगढी उप–महानगरपालिका वडा नम्बर १ एलएन चोक सडकखण्डमा साईकलमा गइरहेका धनगढी–१३ का २१ वर्षीय सोमराज जोशीलाई अवैध औषधि सहित पक्राउ गरिएको थियो ।

प्रहरीले उनको साथबाट चिकित्सकको स्विकृती बिना खरिद गरिएको स्पास्मो २० ट्याब्लेट, पर्लिन–७५ का २ क्याप्सुल र प्रेग्यास्टार–१५० लेखेको १२ क्याप्सुल बरामद गरेको थियो । अनुसन्धानका क्रममा उनले ती औषधि धनगढी–१ स्थित अस्पताल लाइनमा रहेको सन्तोष मेडिको प्रालिबाट खरिद गरेको भन्ने जानकारी दिएका थिए ।

प्रहरी नायब उपरिक्षक बिष्टले बरामद औषधी र पक्राउ परेका दुवै जनालाई आवश्यक कारवाहीका लागि औषधि व्यवस्था विभाग नेपालगञ्ज पठाउने तयारी भइरहेको बताए  ।