गेटा आँखा अस्पतालद्वारा मंगलशैनमा शाखा विस्तार

धनगढी

नेपाल नेत्र ज्योति संघ गेटा आँखा अस्पतालले १६ औं शाखाका रुपमा अछामको मंगलशैनमा आँखा उपचार केन्द्र विस्तार गरेको छ ।

मंगलसैन नगरपालिका र सेभा नेपालको सहयोगमामा अछामको मंगलशैनमा शाखा विस्तार गरिएको गेटा आँखा अस्पतालका बाह्य कार्यक्रम संयोजक रमेश चन्द भट्टले बताए ।

उक्त उपचार केन्द्रमा अत्याधुनिक उपकरणहरुको प्रयोग गरि आँखा परिक्षण, औषधि उपचारको साथै सामान्य शल्यक्रिया समेत गरिने संयोजक भट्टले बताए ।

सो शाखाबाट आँखाको जटिल समस्या भएका बिरामीहरुलाई आँखा परिक्षण गरिने उपकरणमा नै जडित क्यामराको मदतले टेलिमेडिसिनको प्रयोग गरी गेटा आँखा अस्पतालका नेत्र विशेषज्ञबाट आँखा परिक्षण र आवस्यक परामर्श समेत प्रदान गरिने व्यवस्था गरिएको उनले बताए ।

नेपाल नेत्रज्योति संघ जिल्ला शाखा अछामका सभापति प्रेम बहादुर रावलको अध्यक्षतामा गरिएको उद्घाटन कार्यक्रम जिल्ला समन्वय समिति अछामका प्रमुख नर बहादुर कुंवरले उद्घाटन गरेका थिए । कार्यक्रममा बिशिष्ट अतिथि मंगलसैन नगरपालिकाका नगर प्रमुख पदम बोहरा, प्रमुख जिल्ला अधिकारी रुद्र प्रशाद मल्ल रहेका थिए ।

कार्यक्रममा  गेटा आँखा अस्पतालका वाह्यकार्यक्रम व्यवस्थापक रमेश चन्द्र भट्टले आँखा उपचार केन्द्रले प्रदान गर्ने सेवाको बिषयमा जानकारी गराएका थिए ।