गृह मन्त्रालयको छानविन समितिले प्रत्यक्षदर्शीसंग कुरा गर्दै

धनगढी

भारतीय एसएसपिका जवानले तुईन काटेर युवकलाई महाँकाली नदीमा खसाएको विपषयमा छानविन गर्न गृहमन्त्रालयले गठन गरेको छानविन समितिले आज स्थानीय प्रत्यक्ष दर्शि संग कुरा गर्ने तयारी गरेको छ ।

सोमबार काठमाण्डौंबाट हिडेको छानविन समितिको टोली मंगलबार (आज) दार्चुला पुगेको हो । दार्चुला सदरमुकाम पुगेको छानविन टोलीले सदरमुकाममै झिकाइएका प्रत्यक्षदर्शि संग कुरा गर्ने समितिकी सदस्य तथा दार्चुलाकी सहायक प्रमुख जिल्ला अधिकारी ज्योत्सना भट्ट जोशीले बताइन् ।

यही साउन १५ गते तुईन तर्नेक्रममा भारतीय एसएसबिले तुइन काट्दा स्थानीय जयसिंह धामी महाँकाली नदीमा खसेर वेपत्ता भएका छन् ।

गृह मन्त्रालयले घटनाबारे छानविन गर्न सचिव जनार्दन गौतमको संयोजकत्वमा आइतबार समिति गठन गरेको थियो । छानविनको प्रतिवेदन १० दिन भित्र बुझाउनुपर्ने समयसीमा पाएको समितिले यस पछि स्थलगत अनुमगन गर्ने तयारी समेत गरेको छ ।

समितिमा सुदूरपश्चिम प्रदेशका प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्स्नता भट्ट सदस्य छन् ।

यस अघि जिल्ला प्रशासन कार्यालय दार्चुलाले समेत घटनाको छानविन गर्न समिति गठन गरेको छ ।

सशस्त्र प्रहरी बल नेपाल गण ४४, प्रहरी नायब उपरिक्षक विजयसिंह धामी, जिल्ला प्रहरी कार्यालय दार्चुलाबाट प्रहरी निरिक्षक नरेन्द्रबहादुर चन्द र राष्ट्रिय अनुसन्धान जिल्ला कार्यालयका विक्रमसिंह ढाँडसहित ३ जनाको टोलीले स्थलगत छानविन गरेको छ ।

उक्त टोलीले घटनाका प्रत्यक्षदर्शीहरू कल्याणसिंह धामी, अनिता धामी, विक्रम रङ्कोली र अन्य तीन गाउँलेलाई सदरमुकाम ल्याएको छ ।