धनगढी उप–महानगरले २८ बेडको आईसोलेशन संचालनमा ल्यायो

धनगढी

     सुदूरपश्चिममा कोरोना संक्रमितको संख्या बढ्दै गएपछि प्रदेशको एकमात्र उपमहानगरपालिका  धनगढीले आफ्नै आईसोलेशन निर्माण गरि संचालनमा ल्याएको छ । कोरोना संक्रमितको उपचारका लागि धनगढी उप–महानगरपालिकाले बुधवार देखि २८ वेडको आईसोलेशन संचालनमा ल्याएको छ ।

       उप–महानगरपालिका वडा नं १५ जडिबुटी प्रशोधन केन्द्रमा निर्माण गरेको आईसोलेशनमा संक्रमित बिरामीहरु राख्न सुरु भैसकेको  छ । ‘ संक्रमितहरुलाई आईसोलेशनमा राखेर उपचार गर्न शुरु गरेका  छौं’ नगर प्रमुख नृप बहादुर वडले भने– आवश्यकता अनुसार बेड र अन्य सुबिधा थप गर्दै जानेछौं ।’ अहिले संचालनमा ल्याएको आईसोलेशनमा १ सय ५० वेड सम्म बनाउन सकिने नगरप्रमुख वडले बताए ।

     प्रदेशको कोरोना अस्पताल  सेती प्रादेशीक अस्पतालमा ६५ वटा मात्रै आईसोलेशन वेड रहेका छन् । ‘प्रदेशभरीका संक्रमितहरुको उपचार गर्नुपर्ने भएकाले त्यहाँ बिरामीले ठाउँ पाएका छैनन्’ नगर प्रमुख वडले भने– ‘त्यसैले पनि धनगढीलाई आईसोलेशन निर्माणको आवश्यकता भयो र दुर्त गतिमा निर्माण गरेर संचालनमा ल्यायौं ।’

  नगर प्रमुख वडका अनुसार धनगढी उप–महानगरपालिकाले महिलाका लागि धनगढीमा रहेको बि.पोलिटेकमा १० वेडको ओइसोलेशन बनाउने तयारी गरिरहेको छ ।  हालसम्म धनगढी उप–महानगरपालिका भित्र मात्रै ६५ जना कोरोना संक्रमित रहेका  छन् । जसमध्य २ जनालाई सेती प्रादेशीक अस्पतालमा राखेर उपचार भैराखेको छ  भने वाँकी बिभिन्न वडामा रहेका क्वारेन्टाईनमै रहेका छन् ।  ७ जना भने उपचारपछि निको भएर घर फर्किसकेका छन् ।

   धनगढी उप–महानगरपालिका कोभिड उप–समितिका संयोजक नारायण प्रसाद बरालले जटिल अवस्थामा रहेकाहरुलाई मात्रै आईसोलेशनमा राखेर उपचार गरिने बताए ।