पासो थापेको बन्दुक पड्किंदा १ जनाको मृत्यु

डडेल्धुरा । जंगली जनावर मार्नका लागि पासो थापिएको बन्दुक पड्किंदा डडेल्धुरमा एक जनाको मृत्यु भएको छ ।

मंगलबार राति गन्यापधुरा गाउँपालिका–५ स्थित पटौरा सामुदायिक वनमा जङ्गली जनावर मार्नका लागि भरुवा बन्दुकको पासो थापेका गन्यापधुरा ४ का ४५ वर्षीय दलबहादुर पानलाई सोही बन्दुकको गोली लाग्दा मृत्यु भएको प्रहरीले जनाएको छ । जिल्ला प्रहरी कार्यालय डडेल्धुराका अनुसार दलबहादुरको डडेल्धुरा अस्पताल लैजादैँ गर्दा बाटोमा नै मृत्यु भएको हो ।

उनको शव अस्पतालमा राखिएको बताइएको छ ।  त्यस्तै, घटनामा संलग्न रहेको हुनसक्ने भन्दै प्रहरीले अन्य ४ जनालाई नियन्त्रणमा लिई घटनाबारे आवश्यक अनुसन्धान गरिरहेको बताएको छ । नियन्त्रणमा लिइएकाहरुको परिचय भने प्रहरीले खुलाएको छैन ।