चुरे गाउँपालिका अध्यक्षमा एमाले र उाध्यक्षमा कांगे्रस विजयी

धनगढी । कैलालीको चुरे गाउँपालिका अध्यक्षमा एमालेका उम्मेदवार विजयी भएका छन् भने उपाध्यक्षमा नेपाली कांग्रेसका उम्मेदवार विजयी भएका छन् । चुरे गाउँपालिकामा सत्तारुढ पाँच दलको समर्थन पाएका नेकपा एकीकृत समाजवादीका उम्मेदवारलाई पराजित गर्दै एमालेका चक्रबहादुर बोगटी २४ मतको झिनो मत अन्तरले निर्वाचित भएका हुन् ।

बोगटीले तीन हजार ३०५ मत पाएर विजयी हुँदा उनका निकटतम प्रतिद्वन्दि नेकपा एकीकृत समाजवादीका लोकबहादुर सारुमगरले तीन हजार २८१ मत ल्याएर पराजीत भए ।

चुरेको उपाध्यक्षमा भने गठबन्धनबाट नेपाली कांग्रेसकी धना थापा निर्वाचित भएकी छन् । थापाले तीन हजार ४ सय ४९ मत ल्याएर विजयी हुँदा प्रतिद्वन्द्वी एमालेकी दीपादेवी साउदले तीन हजार १२१ मत पाएकी छन् ।

त्यसैगरी छ वटा वडा रहेको यो गाउँपालिकामा वडा नम्बर १ मा नेपाली कांग्रेसले वडाध्यक्ष र अन्य सबै वडामा नेकपा एमालेका वडाध्यक्ष विजयी भएका छन् ।