हेबिटेटले समुदायमै मनायो २५ औं बर्ष बिशेष

कन्चनपुर ।  हेबिटेट नेपालले  नेपालमा काम शुरु गरेको २५ औं बर्ष बिशेष कार्यक्रम  सुरक्षित आवास कार्यक्रम संचालन भैरहेको गाउँमा नै मनाएको छ । कन्चनपुरको बेदकोट नगरपालिकाको धरमपुरमा ह्याबिटेटले समुदाय, स्थानीयर सरकार र सामाजिक संस्थाहरुको सहभागितमा  २५बर्ष गाठ मनाएको हो ।

समुदायको सुरक्षिक आवास कार्यक्रमका लागि कार्य गरिरहेकोले २५ बर्ष पुगेको खुशी समुदायसँग नै साट्न गाउँमा नै मनाएको हेबिटेट नेपाल पश्चिम फिल्ड कार्यालय धनगढीका कार्यक्रम व्यवस्थापक पुनिता चौधरीले बताइन् ।  “हामी जुन समुदायसँग मिलेर काम गरिरहेका छौं, त्यसै समुदाय र स्थानीय सरकारसँग मिलेर बर्षगाठ मनाएका हौं ।” कार्यक्रम व्यवस्थापक चौधरीले भनिन्  “हाम्रा मुख्य सरोकारवालासँग खुशी मनाएका हौं । ”

सो अवसरमा बेदकोट नगरपालिकाका मेयर भोजराज बोहराले ब्यवस्थित बस्ती बिकास गर्ने काममा नगरपालिकाले सक्दो सहयोग गर्ने बताए । धरमपुरमा व्यवस्थित बस्ती बिकास गर्ने योजना पुरा हुनु पर्ने बताउँदै मेयर बोहराले  यस कार्यमा सस्थाहरु सक्रिय हुुनु पर्ने र नगरपालिकाले बाटो बनाउन सहयोग गर्ने बताए ।

सुदुरपश्चिम प्रदेशको भुमि व्यवस्था, कृषि तथा सहकारी मन्त्रालयका भुमिश्रोत नक्सांकन महाशाखाका नापी अधिकृत धर्मराज ओझाले हेबिटेटले देखिने गरेर काम गरेको बताउदै यस्ता कामले बिकासमा फड्का् मार्ने बताए ।

धरमपुरका भुमिहीन र अव्यवस्थित बसोबास भएकाहरुलाई पुर्जा बितरणको काम अघि बढेकोले पुर्जासँगै घर हस्तान्तरण गर्न सकेमा राम्रो हुने ओझाले बताए ।

भुमि आयोग कन्चनपुरका अध्यक्ष देवेन्द्रराज ढुंगानाले  जग्गाको नापजाच र अरु काम अन्तिममा रहेको बताउदै  पुर्जा बितरणको काम चाडै शुरु हुने बताए ।

बेदकोट नगरपालिका वडा नम्बर ५ का अध्यक्ष चित्रराज भट्टले धरमपुरमा घर निर्माण भैरहेको ठाउँसम्म बाटो निर्माणको काम नगरपालिकाले गर्ने बताए ।

  हेबिटेट नेपाल पश्चिम फिल्ड कार्यालय धनगढीका कार्यक्रम व्यवस्थापक पुनिता चौधरीको अध्यक्षतामा भएको उक्त कार्यक्रममा राष्टिय  मुक्त हलिया समाज महासँघका अध्यक्ष इश्वर सुनार, राष्टिय दलित नेटवर्कका महासचिव मोहन ओड, वडा नम्बर ४ का पुर्व अध्यक्ष गणेश बिके लगायतले मन्तव्य व्यक्त गरेका थिए । राममणि चौधरीले संचालन गरेको उक्त कार्यक्रममा स्वागत मन्तव्य हेबटेट नेपालकी संचार बिज्ञ प्रकृति नेपालले व्यक्त गरेकी थिइन् ।

धरमपुरमा रहेका भुमिहीन सुकुम्बासी ८४ परिवार मध्य १८ घर यसअघि निर्माण भैसकेका छन् । अहिले  भुमि व्यवस्था, कृषि तथा सहकारी मन्त्रालयको एकीकृत मुख्यमन्त्री बस्ती बिकास कार्यक्रम र हेबिटेनको सहकार्यमा धरमपुरमा अहिले २५ घर निर्माण भैरहेका छन् ।

हेबिटेट नेपालले भुमिहीन, सुकम्वासी, दलित लगायत सामाजिक आर्थिक रुपमा पछाडी पारिएका वर्गको सुरक्षित आवासको लागि सरकारसँगको सहकार्यमा काम गर्दै आइरहेको छ ।