बाघको छालासहित गोदावरीबाट २ जना पक्राउ

धनगढी । बाघको छाला सहति गोदावरी नगरपालिकाबाट दुई जना पक्राउ परेका छन् ।

प्रहरीका अनुसार गोदावरी नगरपालिका–२ रिङरोडबाट बाघको छालासहित बैतडीका २ जना पक्राउ परेका हुन् । नेपाल प्रहरी प्रदेश कार्यालय महेन्द्रनगर र इलाका प्रहरी कार्यालय मालाखेती, कैलालीको संयुक्त टोलीले बैतडीको दोगडाकेदार गाउँपालिका–२ का ६५ वर्षीय देवसिंह बिष्ट र बैतडीकै पाटन नगरपालिका–८ का ३० वर्षीय हर्कबहादुर बिष्टलाई पक्राउ गरेको हो ।

उनीहरुको साथबाट ६ फिट ११ इन्च लम्बाइ र २ फिट ४ इन्च चौडाइ भएको बाघको छाला बरामद भएको छ । पक्राउ परेका दुई जनामाथि थप अनुसन्धान भइरहेको इलाका प्रहरी कार्यालय मालाखेतीले जानकारी दिएको छ ।