बैंकको कर्मचारी भन्दै कमिशन दिए ऋण पास गरिदिन्छु भन्ने २ जना प्रहरीद्धारा पक्राउ

धनगढी

   आफु बैंकको कर्मचारी भएको भन्दै कमिशन दिए ऋण स्वीकृत गरिदिने भनेर ठगी गरेको आरोपमा प्रहरीले दुई जनालाई  पक्राउ गरेको छ । फक्राउ पर्नेमा दार्चुला जिल्लाको लेकम गाउँपालिका १ का ३२ बर्षीय पदम राज भट्ट र डोटी जिल्लाको आदर्श गाउपालिका वडा नम्बर ३ घर भई सिलगडीमा डेरा गरी बस्ने बर्ष ३५ की सन्जा कुमारी कठायत रहेको जिल्ला प्रहरी कार्यालय कैलालीले जनाएको छ । उनीहरुलाई डोटी जिल्लाको पिपल्लाबाट पक्राउ गरिएको हो ।

   नेपाल बैंक लिमिटेडमा शाखा अधिकृतको रुपमा कार्यरत रहेको भन्दै टीकापुर नगरपालिका वडा नम्बर  १ की एक  महिलासँग १० लाख रुपैयाँ दिएमा ३ करोड ५० लाख ऋण स्वीकृत गरिदिन्छु भनेर ठगी गरेको प्रहरीले जनाएको छ । ती महिलाले शंका लागेर प्रहरीमा उजुरी गरेपछि प्रहरीले अनुसन्धान गरेर ती दुवै जनालाई पक्राउ गरेको हो ।   

    धनगढी वडा नम्बर ५ मा घर भएको परिचय दिने भट्टको साथबाट नेपाल बैंक लिमिटेडको नक्कली परिचय पत्र, बिभिन्न बैंक तथा आइएमईका भौचर समेत प्रहरीले बराद गरेको छ । प्रहरीका अनुसार उनीहरु बिरुद्ध  ठगी शीर्षकमा मुद्धा दर्ता गरि कैलाली जिल्ला अदालतबाट म्याद थप गरेर अनुसन्धन भैरहेको छ ।

   भट्टले आमा बुवा भुकम्पमा परेर मरेका र बैंकको शाखा प्रवन्धकको परिचय दिंदै  जागीर लगाइदिने भनेर फेसबुक, फोन मार्फत परिचय गरि ठगी गरेको प्रहरीले जनाएको छ ।  भट्ट यसअघि पनि अपहरण तथा जबरजस्ती चोरीम मुद्धा चलेर पुर्पक्षका लागि कारागार गएर धरौटीमा छुटेका व्यक्ति रहेको जिल्ला प्रहरी कार्यालय कैलालीले जनाएको छ ।