कैलाली र दार्चुलामा लागुऔषधसहित ४ जना पक्राउ

धनगढी । कैलाली र दार्चुलामा लागुऔषधसहित ४ जना पक्राउ परेका छन्। कैलालीबाट ३ र दार्चुलाबाट एक जनालाई प्रहरीले लागुऔषधसहित पक्राउ गरेको हो।

कैलालीको गोदावरी नगरपालिका-८ फकलपुरका ३५ वर्षीय निर्मल चौधरीलाई १ ग्राम ५० मिलिग्राम लागुऔषध खैरो हेरोइनसहित प्रहरीले पक्राउ गरेको छ। 

हिँडिरहेको अवस्थामा शंका लागेर जाँच गर्दा चौधरीको साथमा खैरो हेरोइन भेटिएको थियो। 

यस्तै कैलालीको लम्किचुहा नगरपालिका-३ चिसापानी खैरेनीमा चरेससहित दुई जना पक्राउ परे।

इलाका प्रहरी कार्यालय चिसापानी र लागुऔषध नियन्त्रण ब्युरो शाखा कार्यालय महेन्द्रनगरको संयुक्त प्रहरी टोलीले कालिकोटको पचालझरना गाउँपालिका(६ का २८ वर्षीय अर्जुन बुढा र २७ वर्षीय वीरेन्द्र बुढालाई पक्राउ गरेको हो।

पूर्वपश्चिम राजमार्गमा उभिरहेका उनीहरूलाई शंका लागेर जाँच गर्दा झोलामा लुकाएको २ केजी ७५ ग्राम चरेस बरामद भएको प्रहरीले जनाएको छ। 

दार्चुलाको मालिकार्जुन गाउँपालिका-८ ऐरीछानाबाट चरेशसहत एक जना पक्राउ परेका छन्।

प्रहरी चौकी शंकरपुरपस्तीबाट  खटिएको प्रहरी टोलीले ५२ वर्षीय धनसिंह धामीलाई पक्राउ गरेको हो। उनको साथमा ६।९६ ग्राम चरेश फेला परेको प्रहरीले जनाएको छ।