कैलालीका पालिकाहरुबीच असल सिकाई आदानप्रदान

कैलालीका पालिकाहरुबीच  अन्तरपालिका स्तरीय सिकाई आदान प्रदान कार्यक्रम धनगढीमा सम्पन्न भएको छ । जिल्ला समन्वय समितिको आयोजना तथा द एसिया फाउण्डेशन स्थानीय सरकार सबलीकरण कार्यक्रमको आर्थिक सहयोगमा भएको उक्त  कार्यक्रममा कैलालीका १२ पालिकाहरुले आफुले गरेका असल अभ्यासहरुको प्रस्तुति गरेका थिए ।

धनगढी उपमहानगरपालिकाका जनस्वास्थ्य अधिकृत भुपेन्द्र महराले  हाम्रो धनगढी हामी बनाउँछौं भन्ने अभियानलाई निरन्तता दिएर  बिकास  र जनताका सरोकारका मुद्धाहरु सम्वोधन भैरहेको बताए ।

सार्वजनिक जग्गामा रहेको प्राकृतिक तालको पुनर्भरणको लागि प्रयोग हुने गरि पुरानै अवस्थामा  फर्काउने कार्य भैरहेको बताउँदै महराले हालसम्म १५ वटा  तालहरुलाई पुनर्भरण सहित आर्थिक एवक पर्यटकीय क्षेत्रको रुपमा बिकास गरिएको बताए ।

आम नागरिककको सहज पहुच बनाउन नगर बसको संचालन गरिएको,  शहरका मुख्य क्षेत्रमा सर्वसधारण बटुवाहरुलाई सहुलियत दरमा शुद्ध खानेपानी उपलव्ध गराउन  २ स्थानमा वाटर एटीएम जडान गरिएको महराले बताए ।

जानकी गाउपालिकाका अध्यक्ष गणेश चौधरीले गहुबालीमा उत्पादनमा आधारित अनुदान प्रोत्साहन कार्यक्रम सँचालन  गरिएको र १ शय ७६ किसानले अनुदान लगिरहेको बताए । बिद्यालयहरुको नतिजाका आधारमा  सहयोग गर्ने गरिएको,  बिद्यालयमा करेसाबारी कार्यक्रम, दिवा खाजाको सहयोग गरिरहेको अध्यक्ष चौधरीले बताए ।

कैलारी गाउपालिकाका यगम कलेलले ग र घ बर्गका अपांगलाइ भत्ता  र बिद्यालय बाहिर रहेका बालबालिकाहरुलाई हस्तकलाका सामान उत्पादनमा जोडेर आयआर्जन बृद्धिको काम भैरहेको बताए ।

भजनी नगरपालिकाका बिष्णुराज न्यौपानेले बाढीको समयमा २४ सै  घण्टा आपतकालीन कार्य संचालन केन्द्र संचालन गरिने,  जमिनको सतह भन्दा ८ फीट माथि ८७ आवास निर्माण गरिएको बताए । धनगढी र टीकापुर टाढा हुने भएकाले नगरपालिकाले नै राष्टिय परिचय पत्रको  निर्माणको काम गर्ने र चैते धानलाई प्रवद्र्धनको काम भैरहेको बताए ।

सो अवसरमा जिल्लाका १२ वटा पालिकाहरुले आर्थिक वर्ष २०८१।०८२ मा गरेका उत्कृष्ठ अभ्यासहरुबारे प्रस्तुती गरेका थिए ।

जिल्ला समन्वय समितिका संयोजक टीकाकुमारी चौधरी भुलको अध्यक्षतामा भएको कार्यक्रममा जिल्ला समन्वय अधिकारी भोजराज भटट्ले पालिकाले सम्पादन गरेका असल अभ्यासको सन्देश नागरिकलाई पुर्याउन आवश्यक रहेको बताए ।

कार्यक्रममा बोल्दै जिल्ला समन्वय समितिका संयोजक टीकाकुमारी चौधरी भुलले असल अभ्यास सिकाई आदानप्रदान कार्यक्रमले अन्य पालिकालाई प्रेरणा दिने बताउँदै फोहोरलाई मोहर बनाउने, सडकमा नाली अनिवार्य गर्ने, उत्पादनका आधारमा अनुदान दिने जस्ता कार्यक्रम कैलालीकै लागि उत्कृष्ठ रहेको बताइन् ।

कार्यक्रमको सहजीकरण बिमलराज जोशीले गरेका थिए ।