कैलाली कारागार कैदीको कब्जामा, संवादका लागि नेपालगञ्जबाट जेलर मगाइए

धनगढी । शनिबार बिहान भएको झडप पछि कैलाली कारागार पूर्णरुपमा कैदीबन्दीको नियन्त्रणमा रहेको छ । घटनापछि कारागार अवलोकन गर्न जाँदा कैदीले भित्र पस्न नदिएको कैलालीका प्रमुख जिल्ला अधिकारी गोगन हमालले बताए । ‘कैदीले मुख्य गेटमा सिलिण्डर राखेका छन्, ‘प्रमुख जिल्ला अधिकारी हमालले भने, ‘भित्र छिरे पड्काउने धम्कि दिन थाले, सुरक्षा संवेदनशिलतालाई मध्यनजर गरेर हामी भित्र पसेनौ, अहिले कारागार कैदीकै नियन्त्रणमा छ ।’ कारागार भित्र जान नपाएपछि के कति क्षति भएको छ भन्ने जानकारी समेत प्राप्त नभएको हमालले बताए ।

उनका अनुसार कैदीबन्दीहरुले भित्रबाट ताला लगाएर थुनुवा कक्षको मुल गेटमा ग्याँस सिलिन्डर राखेका छन् । कोही भित्र प्रवेश गरे सिलिण्डर पड्काएर आगो लगाइदिने चेतावनी उनीहरुले दिएका छन् । कैलालीको सुरक्षा टोलीबाट संवाद सम्भवन नभएपछि नेपालगञ्जबाट जेलर मगाएर संवाद गर्ने प्रयास भइरहेको प्रमुख जिल्ला अधिकारी हमालले बताए । प्रमुख जिल्ला अधिकारी हमालले नेपालगञ्जबाट शनिबारनै जेलर धनगढी पुगेर कैदीसंग संवाद गर्ने प्रयास गरेको बताए ।

मुख्यमन्त्री र गृहमन्त्री बीच छलफल

धनगढी । कैलाली कारागार घटनाका विषयमा मुख्यमन्त्री र गृहमन्त्री बिच छलफल भएका छ । शनिबार गृहमन्त्री रमेश लेखक र सुदूरपश्चिम प्रदेशका मुख्यमन्त्री कमल बहादुर शाह बिच छलफल भएको हो । छलफलमा कैलाली कारागारमा घटेको घटना, सुदुरपश्चिम प्रदेशको शान्ति सुरक्षा र विपद् व्यवस्थापनका विषयमा छलफल भएको मुख्यमन्त्रीको सचिवालयले जनाएको छ ।