भारतको  उत्तराखण्डमा बाढीपहिरोमा बाजुराका २ जनाको मृत्यु

बाजुरा । भारतको उत्तराखण्डमा बाढीपहिरोमा परी बाजुराको स्वामीकार्तिक खापर गाउँपालिकाका २ जनाको मृत्यु भएको पुष्टि भएको छ । बाढी पहिरोमा परेर २४ जना घाइते भएका छ । साउन २० गते उत्तराखण्डको उत्तरकाशी जिल्लाको धराली गाउँमा अचानक आएको बाढीपहिरोमा परी श्रीमान–श्रीमतीको मृत्यु भएको हो । मृत्यु हुनेमा स्वामीकार्तिक खापर गाउँपालिका वडा नम्बर २ बस्ने अन्दाजी २३ का रमेश बुढा र उनकी २१ बर्षकी श्रीमती प्रिया बुढा रहेका छन् ।

रोजगारीका लागि छिमेकी देश भारतमा गएका जोडी बाढीपहिरोमा परी सदाका लागि संसारबाट बिदा भएका छन । त्यस्तै उक्त बाढीपहिरोमा परी सोही पालिकाका २४ जना घाइते भएका छन् । घाइते हुनेमा स्वामीकार्तिक खापर गाउँपालिका– १ का ३६ बर्षका प्रकाश बुढा, २४ बर्षकी पछना बुढा, २७ बर्षका धन बुढा, २८ बर्षका महेन्द्र महतारा, जयन्द्र बुढा छन् ।

त्यस्तै वडा नम्बर २ का ४९ बर्षका पसे बुढा, २९ बर्षका दिनेश बुढा रहेका छन् । त्यस्तै ४२ बर्षका मान बहादुर बुढा, ३२ बर्षका रजबहादुर महतारा, जनेश बुढा, पछी महतारा, बिर बुढा, बर्षनी बुढा घाइते भएका छन् ।

त्यसैगरी, ७ महिने बालिका अपसरा बुढा, ३ बर्षका बादल बुढा, २९ बर्षका मादप महतारा, विपना बुढा, ३४ बर्षका दिपेन्द्र महतारा, ३० बर्षका मान बहादुर बुढा, विष्णा बुढा, पल्लव महतारा, रुप्सा बुढा, पुष्पराज बुढा र रुप्स बुढा घाइते भएको गाउँपालिकाले जनाएको छ ।

उक्त घटनाप्रति गाउँपालिकाले समेत दुःख व्यक्त गरेको छ । प्रायः सुदूरपश्चिमका ९ वटै जिल्लाका नागरिकहरु छोराछोरीको पालन पोषण तथा घरखर्च चलाउन र केही सुःख पाउने आशले रोजगारीका लागि दोस्रो मुलुक पुगेकाहरु नै विभिन्न घटनामा परी कोही घाइते त कोही ज्यान गुमाउन बाध्य छन् ।