कारागारमा घाइते भएका मध्य ३५ जना निकोभए, तर अस्पतालमै राख्नुपर्ने बाध्यता

धनगढी । कैलाली कारागारमा भएको झडपमा परी घाइते भएका मध्य ३५ जना कैदीवन्दी अस्पतालबाट फर्केका छन् । डिस्चार्ज भएका सवै कैदिको अवस्था सामान्य रहेको सेती प्रादेशिक अस्पतालका सूचना अधिकारी किशोरप्रसाद श्रेष्ठले बताए । गत शुक्रवार राति कैदीबिच भएको हिंसात्मक झडपमा परी घाइते भएका ४९ जना कैदीबन्दीलाई उपचारका लागि अस्पताल भर्ना गरिएको थियो । झडपमा परी ४० वर्षीय भरत चौधरीको मृत्यु भएको थियो । गम्भीर घाइते भएका तीन जनालाई थप उपचारका लागि काठमाडौँ रेफर गरिएको सूचना अधिकारी श्रेष्ठले बताए । बाँकी ४४ मध्ये ३५ जना निको भई डिस्चार्ज भइसकेका र नौ जनाको अस्पतालमा उपचार जारी रहेको छ । डिस्चार्ज भएका घाइते कैदीबन्दीलाई कैलाली कारागारमै पुनस्र्थापना गर्न कठिन भएपछि उनीहरूलाई सेती प्रादेशिक अस्पतालमै राखिएको छ । अस्पतालमा राखिएका कैदीबन्दीको सुरक्षा सशस्त्र प्रहरीले गरिरहेको जिल्ला प्रहरी कार्यालयका प्रवक्ता राजकुमार सिंहले बताए । कैलाली कारागारका जेलर जालन्धर भुषालले डिस्चार्ज भएका कैदीलाई कारागारमै राखे रिसिबि बढ्न सक्ने भएका कारण हालका लागि डिस्चार्ज भएकालाई पनि अस्पतालमै राख्नु परेको बताए । ती कैदीलाई अन्यत्र स्थानान्तरणका लागि गृहकार्य भइरहेको उनले बताए ।