टप इन्ड टी–२० : नेपाल बंगलादेश ‘ए’ सँग ३२ रनले पराजित

अष्ट्रेलियामा जारी टप इन्ड सिरिज टी–२० क्रिकेटमा नेपाल दोश्रो खेलमा पनि पराजित भएको छ । शनिबार डार्विनमा भएको आफ्नो दोस्रो खेलमा नेपाल बंगलादेश ‘ए’ सँग ३२ रनले पराजित भएको हो ।

टस जितेर पहिले ब्याटिङ गरेको बंगलादेश ‘ए’ले निर्धारित २० ओभरमा ६ विकेट गुमाएर १८३ रन बनाएको थियो । जवाफी ब्याटिङमा उत्रिएको नेपाल २० ओभरमा ७ विकेट गुमाएर १५४ रनमा समेटिएको थियो ।

नेपालका लागि कुशल मल्लले सर्वाधिक ५९ रनको योगदान दिए । उनले ४७ बलमा ६ चौका र १ छक्का प्रहार गरे । नन्दन यादव १४ रनमा अविजित रहे भने ओपनर आसिफ शेखले २८ रन बनाए । तर, अन्य ब्याटरहरू नल्न सकेनन् ।

यसअघि, बंगलादेशका लागि जिसन आलमले ७३ रनको उत्कृष्ट पारी खेले । उनले ५१ बलमा ८ चौका र ३ छक्का प्रहार गर्दै टोलीलाई बलियो स्कोर बनाउन मद्दत गरे । यस्तै, आफिफ होसैनले अविजित ४८ रन जोडे भने कप्तान महिदुल इस्लाम अन्कोनले २६ रन बनाए ।

नेपालका बलरमध्ये करण केसी, गुलशन झा, नन्दन यादव, कुशल मल्ल, सन्दीप लामिछाने र दिपेन्द्रसिंह ऐरीले एक–एक विकेट लिए ।

यसअघि भएको आप्mनो पहिलो खेलमा नेपाल एनटी स्ट्राइकसँग ४२ रनले पराजित भएको थियो ।

टप इन्ड सिरिज अगस्त १४ देखि २४ तारिखसम्म सञ्चालन हुनेछ । शृंखलामा नेपालले आफ्नो तेस्रो खेल अगस्त १८ तारिखमा स्टार्ससँग र चौथो खेल १९ तारिखमा हरिकन्ससँग खेल्नेछ ।