अस्ट्रेलियामा टप इन्ड टी– २० :   तेश्रो खेलमा नेपाल मेलबर्न स्टार्ससँग  पराजित

अघिल्ला दुई खेलमा पराजित भएको नेपाल आज मेलबर्न स्टार्ससँग ३१ रनले पराजित भयो ।  डार्बिनमा मेलबर्नले दिएको १७६ रनको लक्ष्य पछ्याएको नेपालले निर्धारित २० ओभरमा ७ विकेट गुमाएर १४४ रन मात्रै बनाउन सक्यो ।

नेपालका ओपनर आशिफ शेखले ५३ रनको अर्धशतकीय पारी खेले । कप्तान रोहितकुमार पौडेलले ३३ रन बनाए । यस्तै कुशल भुर्तेलले २५ तथा कुशल मल्लले ११ रन बनाउनु बाहेक अन्यले दोहोरो रन जोड्न सकेनन् ।

त्यसअघि अस्ट्रेलियाको डार्बिनमा टस जितेर पहिला ब्याटिङ गरेको मेलबर्नले २० ओभरमा ७ विकेट गुमाएर १७५ रन बनाएको थियो । मेलवर्नका लागि ब्लाक म्याकडोनाल्डले ७४ र थोमस रोजर्सले ६५ रन बनाए ।

नेपालका सन्दीप लामिछानले ३ र सोमपाल कामीले २ विकेट लिए । त्यस्तै शहबाज आलमले १ विकेट लिए ।

नेपाल यसअघि एनटी स्ट्राइक्स र बंगलादेश ‘ए’सँग पराजित भएको थियो ।  नेपालले अर्को भोलि होबर्ट हुरिक्यान्ससँग, बुधबार मेलवर्न रेनेगेड्स र आगामी शुक्रबार पाकिस्तान ए सँग खेल्ने तालिका रहेको छ ।