डिभिजन बन अधिकृत पूर्णशंकर यादव विरुद्ध भ्रष्ट्राचार मुद्धा

धनगढीः कैलालीको डिभिजन वन कार्यालयका वरिष्ठ वन अधिकृत पूर्णशंकर यादवविरुद्ध भ्रष्टाचार मुद्दा दायर गरिएको छ । अख्तियार दुरुपयोग अनुसन्धान आयोगले विशेष अदालत काठमाडौंमा आरोपपत्र दायर गरेको हो । अख्तियारका प्रवक्ता राजेन्द्रकुमार पौडेलका अनुसार यादवलाई ७ लाख ३१ हजार घुस रकमसहित पक्राउ गरिएको थियो । ‘चुरे गाउँपालिका– ६ स्थित ग्वासी सामुदायिक वनको घाटगद्दी गरेको काठको बिमार्का र छोडपूर्जीको लागि सेवाग्राहीसँग घुस माग गरेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय, कञ्चनपुरबाट खटिएको टोलीले यादवलाई सेवाग्राहीबाट ७ लाख ३१ हजार रुपैयाँ घुस लिइसकेको अवस्थामा नियन्त्रणमा लिइएको थियो,’ प्रवक्ता पौडेलले भनेका छन् ।

अनुसन्धानबाट घुस लिएको स्थापित भएकोले निज यादवलाई भ्रष्टाचार निवारण ऐन, २०५९ को दफा ३ को उपदफा (१) बमोजिमको कसूरमा ७ लाख ३१ हजार कायम गरी भ्रष्टाचार निवारण ऐन, २०५९ को दफा ३ को उपदफा (१) को देहाय (घ) बमोजिम कैद र सोही ऐनको दफा ३ को उपदफा (१) अनुसार बिगो बमोजिम जरिवाना सजाय हुन माग दाबी लिई आरोपपत्र दायर गरिएको प्रवक्ता पौडेलले बताए ।