कैलाली १ को प्रतिनिधि सभा र दुवै प्रदेश सभामा नागरिक उन्मुक्तिको अग्रता

धनगढी : कैलालीको निर्वाचन क्षेत्र नम्बर १ को प्रदेश सभा सदस्यका दुबै निर्वाचनमा नागरिक उन्मुक्ति पार्टीका उम्मेदवार अगाडि छन् । प्रतिनिधि सभा सदस्यमा नागरिक उन्मुक्ति पार्टीका रन्जिता चौधरीले अग्रता बनाइरहेका बेला उक्त क्षेत्रमा  प्रदेशमा पनि सोही पार्टीका उम्मेदवार अगाडि रहेका हुन् ।

जिल्लाको निर्वाचन क्षेत्र नम्बर १ मा प्रदेश सभा १ मा एक हजार ८६१ मतगणना हुँदा नागरिक उन्मुक्तिका कैलाश चौधरी ७१३ मत सहित अग्रतामा छन् । उनलाई सत्ता गठबन्धनका उम्मेदवार माओवादी केन्द्रका दीर्घराज विनाडीले ५५९ मत सहित पच्छाइरहेका छन् ।

प्रदेश सभा २ मा पनि नागरिक उन्मुक्ति पार्टीका लक्ष्मण किशोर चौधरीको अग्रता छ । एक हजार ५१६ मत गणना हुँदासम्म चौधरीको ७१३ मत छ । उनलाई सत्ता गठबन्धनका उम्मेदवार कांग्रेसका डा रणबहादुर रावलले ४१२ मत सहित पच्छाइरहेका छन् ।

एमालेका द्वारिका प्रसाद न्यौपाने तेस्रो छन् । उनको २२६ मत छ ।