आत्महत्या दुरुत्साहन  मुद्धामा रास्वपाका  कन्चनपुर सचिव भट्ट कारागार चलान

आत्महत्या दुरुत्साहन  मुद्धामा  राष्ट्रिय स्वतन्त्र पार्टी (रास्वपा)का कञ्चनपुर जिल्ला सचिव रामदत्त भट्ट पुर्पक्षका लागि कारागार चलान भएका छन् । कञ्चनपुर जिल्ला अदालतले सचिव भट्टलाई कारागार चलान गरेको हो भने उनकी श्रीमतीलाई तारेखमा छोडेको छ ।

भीमदत्त नगरपालिका–६ का वासिन्दा भट्टलाई गत शुक्रबार कञ्चनपुर जिल्ला अदालतले पुर्पक्षका लागि कारागार चलान गरेको हो ।

साउन ३ गते शनिबार भीमदत्त नगरपालिका–७ की एक महिलाले आत्महत्या गरेपछि आत्महत्या दुरुत्साहनको जाहेरीमा सचिव भट्ट र उनकी श्रीमती अनुसन्धानका लागि पक्राउ परेका थिए ।

भट्ट र उनकी श्रीमतीले ती महिलालाई आत्महत्या गर्न बाध्य बनाएको जाहेरी परेपछि दम्पत्तिलाई नियन्त्रणमा लिएर मुद्धा अघि बढाइएको  जिल्ला प्रहरी कार्यालय कञ्चनपुरका प्रवक्ता डिएसपी सागर बोहराले बताए ।

मृतक महिलासँग अनैतिक सम्बन्ध बनाएको र त्यही सम्बन्धका कारण मृतकले विषादी सेवन गरेर आत्महत्या गरेको जाहेरीमा उल्लेख रहेको प्रहरीले जनाएको छ ।