अनुमति नलिएका सामाजिक सञ्जाल शुक्रवारदेखि  बन्द गर्ने  आइस्पानको निर्णय

इन्टरनेट सेवा प्रदायकहरूको छाता संगठन इन्टरनेट सर्भिस प्रोभाइडर एसोसिएसन अफ नेपाल (आइस्पान) ले सरकारले गरेको सामाजिक सञ्जाल सूचीकरण सम्बन्धी निर्णय कार्यान्वयनको तयारी सुरु गरेको छ ।

आइस्पानको बिहीबार बसेको बैठकले प्राविधिक समितिलाई सक्रिय बनाउँदै भोलि  (शुक्रवार) दूरसञ्चार प्राधिकरणसँग छलफल गर्ने र त्यसपछि मात्रै बन्द प्रक्रियामा जाने निर्णय गरेको हो ।

आइस्पानका अध्यक्ष सुधीर पराजुलीले सरकारको निर्देशन प्राप्त भइसकेको भन्दै प्राधिकरण र मोबाइल सेवा प्रदायकसँगको छलफलपछि प्राविधिक प्रक्रियाको आधारमा बन्द गर्ने समय निर्धारण गरिने बताए ।

 भोलि बेलुकासम्म सरकारको निर्णय कार्यान्वयन भइसक्छ,” पराजुलीले भने, “तर प्राविधिक पक्ष र लोड व्यवस्थापनका कारण शुक्रबारदेखि मात्रै सामाजिक सञ्जाल बन्द हुन सक्छ ।

उनका अनुसार सबै सामाजिक सञ्जाल एकैपटक बन्द गर्दा सर्भरमा असामान्य लोड पर्न सक्ने भएकाले एक–एक गर्दै बन्द गर्नुपर्ने हुन्छ । विशेषगरी फेसबुक र युट्युब जस्ता प्लेटफर्मको ट्राफिक बढी  हुने भएकाले तत्कालै इन्टरनेट प्रयोगमै असर पर्न सक्ने सम्भावना पनि उनले औंल्याए ।